Sciarrocus de praza d'Armi. Zuncheddu: "Is Istituzionis funt citias. Po Bertolaso funt 'circustànzias de natura ordinària'"

(IlMinuto) – Casteddu, 10 de su mes''e maju - "Sa protesta de is residentis de s'area chi s'agatat tra Praza d'Armi, bia Peschiera, bia Pastrengo, bia Goito e bia Castelfidardo sighit in sa casi totali ausenzia de is istituzionis. In custus annus, nonostanti is sciarrocus de is palazus e is smuronamentus de su pabimentu de is istradas, is istituzionis abarrant citias". Ddu denunciat cun d'una nota su consilleri comunali de is Rossomori Claudia Zuncheddu, chi at presentau un'interrogazioni aundi dimandat a su síndhigu de Casteddu Emilio Floris impignus precisus in meritu a sa chistioni.
"Sa cosa - precisat Zuncheddu - sighit a essi lassada a cò, no scéti de s'amministrazioni Comunali e Regionali, ma puru de su Capu de sa Protezioni Civili Guido Bertolaso, chi castiat a is sciarrocus giai acontessius in sa zona de Praza d'Armi comenti a 'eventus de natura ordinària', senz''e cunsiderai ca, is sciarrocus e smuronamentus de is istradas, is schinniduras a is fàbbricus e sa ritirada de su terrenu, depint essi bius comenti eventus istraordinàrius".
"Is autoridadis espertas - denunciat sa sardista de sinistra - no ant ancora postu in seguresa sa zona, una zona chi est a arriscu meda artu no scéti po sa salvesa de centu e prus de centu citadinus residentis, ma puru po is impiantus e po su patrimóniu ambientali, istoricu e culturali de s'area. Inútilis is denúnzias de su Comitau de cuarteri Praza d'Armi, chi s'est costituiu a pustis de su dallúviu de su 22 de su mes''e ledàminis de su 2008 e de is sciarrocus".