Loddo (5 novembre): "Inútili e dannosu su ddl 'svuota carceri'. Is presonis ant a abarrai disgàrrigas umanas"

(IlMinuto) – Casteddu, 13 de su mes''e maju - "Su ddl 'svuota carceri' at a diventai unu provedimentu inútili e dannosu". Est cantu denunciat cun d'una nota de imprenta Roberto Loddo de s'associazioni "5 novembre" "po is diritus civilis". "Is presonis sadras - acrarat Loddo - ant a abarrai logus de suferénzia, disgàrrigas umanas chi de legali no tenint nudda, scurregias chi andant contra a sa costituzioni. Is presoneris sadrus ant a sighiri a essi amassaus e scarescius in is cellas comenti primu.
Sa parti in su ddl “svuota carceri” de s'artículu chi previdiat su blocu otomàticu de sa presonia cun sa prova in is serbízius socialis, deludit is aspetativas de totu sa comunidadi de is presonis".
"Lassaus s'abbilesa a is magistraus de decídiri si mandai a is arrestus in domu unu presoneri - denunciat s'esponenti de s'associazioni "5 novembre" -, su sensu de su ddl at a benni furriau a fundu a susu e custu at a arrisultai unu provedimenti inútili".
"Su tentau suicidiu de martis a noti in Boncammino cunfirmat ancora una borta is condizionis de vida meda malas chi ddoi funt in is presonis de sa Sardigna.
"Unu presoneri - narat sa presidenti de s'associazioni "Socialismo, Diritti e Riforme" Maria Grazia Caligaris - at cicau de si bociri. S'ómini salvau de is cumpàngius de cella, narat de essi innocenti e esti stetiu imbistiu de una crisi arrepenti chi dd'at portau a cicai de si ndi liai sa vida".