Istudiu Crenos. 2008-2009 duus annus meda malus po su traballu. Su mercau no pigat in cunsidériu is 50ennis

(IlMinuto) – Casteddu, 28 de su mes''e maju - "Is annadas légias de su 2008 e de su 2009 annullant is importantis mellorias chi si bidiant de s'anàlisi de is annus passaus". Aici su XVII istudiu Crenos "Economia de sa Sardigna" - presentau custu mangianu in Casteddu in s'àula magna de Giurisprudenza - valutat comenti esti andendi su mercau de su traballu in Sardigna. "Est de signalai primu de totu - si ligit in d'una nota de imprenta - s'acrescimentu de su disimpreu, chi est passau de su 12,2 po centu in su 2008 a su 13,3 po centu in su 2009 (in su 2007 furiat cabau asuta de su 10 po centu, ndr) e s'irminorigamentu de su 59,9 po centu a su 58,7 de su tassu de atividadi". Agatai unu traballu nou est sèmpiri prus difícili prusatotu po is personas tra is 45 e is 54 annus. In custa fàscia d'edadi sa possibbilidadi de passai a su bloccu totali de su traballu, una borta chi custu esti stetiu perdiu, est difatis de su 64 po centu (contra a su 51 de su "Mezzogiorno"). "Custu datu - precisat su 'Centro di Ricerche Economiche' - si fait biri s'incapazidadi de s'economia regionali de pigai is traballantis chi benint, sèmpiri cun prus frecuénzia, bogaus de su sistema produtivu po mori de is processus de rennovu industriali".