Comunalis in Tàtari: puru Sardigna Natzione cun Bruno Bellomonte

(IlMinuto) - Casteddu, 10 de su mes''e maju - Puru Sardigna Natzione at a sustèniri a Bruno Bellomonte po s'incàrrigu de síndhigu de Tàtari. Dd'at stabbiliu sa Direzioni nazionali de s'organizazioni indipendentista atobiada sàbudu passau in Casteddu. "Totu cussu chi est acuntessendi a Bellomonte - aclarat sa Direzioni - est un'àteru modu de fai aparèssiri comenti criminali totu su mundu indipendentista sadru". Su militanti de A Manca pro s'Indipendentzia - arregodat su documentu - esti stetiu arrestau in su mes''e làmpadas de su 2010 cun s'acusa "de fait parti de unu grupu armau chi at ai tentu s'intenzioni de torrai a costituiri is Brigate Rosse" e est presoneri de su mes''e làmpadas in su presoni de Sianu, in Calabria.
S'organizazioni indipendentista - si ligit in d'una nota - "connoscit e istimat Bruno Bellomonte, a capu de aMpI e rapresentanti de Unidade Indipendentista, scit ca Bruno, comenti totus nos, at sèmpiri fattu su políticu asuta de sa luxi de su soli e ca no at mai crètiu in sa lota armada comenti métodu po ndi sciolli chistionis chi depint tenni unu determinu políticu".
"Sni - sighit sa nota - pensat ca acostai Bellomonte a is Brigate Rosse no siat possíbbili po unu chi est un'indipendestista sadru (...)".
"Sardigna Natzione, duncas, creit ca Bellomonte no c'intrit nudda cun custas cosas - finit sa Direzioni de su movimentu indipendentista - e at a donai vida a una fibera de manifestazionis, paxiosas, po pediri de ddu spresonai. Tra custas ddoi est s'acotu a sa candidadura de Bruno a síndhigu de Tàtari".