Rossomori. Muledda: "Po Milia at decídiu su comitau provinziali"

(IlMinuto) – Casteddu, 21 de su mes''e arbili - "Po sa candidadura de Graziano Milia a Presidenti de sa Provìnzia de Casteddu, sa decisioni no tocàt e no tòcat a su Consillu nazionali. Tòcat po forma federali de s'organizazioni de is Rossomori a su comitau provinziali de Casteddu, chi, lamau aposta e in totu libbertadi at decídiu. Comentisiollat, sa cundenna de Graziano Milia no est definitiva". Cun custus fueddus su segretariu nazionali de is Rossomori, Gesuino Muledda, at arrespustu a sa lítera oberta de Alessandro Baldussi, Luisella Caria e Tullio Cipriano. Scritu chi iat annunziau, lùnis passau, is dimissionis de is tres consilleris de dognia incàrrigu dirigenti de su partidu, po mori de unu disacórdiu mannu própriu po sa decisioni pigada de is sardistas de sinistra de acotzai sa candidadura de Graziano Milia a sa presidénzia de sa Provìnzia de Casteddu.
A s'arrespusta de Muledda est arribbadu un'àteru repitu firmau Baldussi-Cipriano. "Su balori de sa chistioni morali - scrint is duus consilleris dimissionàrius - est aici pagu importanti po su cumpàngiu Muledda chi pensat ca depat essi delegau a su territoriu scéti comenti 'chistioni de campanibi' e no comenti chistioni de princípiu-basi po totu su movimentu".
"Milia - acrarant - esti stetiu cundennau in apellu. Su giudíziu de crupa est definitivu. Su cumpàngiu Muledda s'imparat ca su terzu gradu de giudíziu pretocat a eventualis fízius de forma e de métodu".