Primu de su mese maju. De S'Asinàra a Barumini: sa Sardigna destrossada de sa crisi "afestat" su traballu

(IlMinuto) – Casteddu, 30 de su mes''e arbili - In su primu de su mes''e maju de su 1886 sa pulizia de Chicagu iat sparau asuba de is operàjus chi furiant in isciòpiru generali po otèniri sa giornada de traballu de ot'oras. A prus de duus séculus de su tràgicu episódiu, funt sempiri de prus - puru in sa Sardigna destrossada de sa crisi - is arrexonis po "afestai" su primu de su mes''e maju : sa Festa internazionali de is traballantis.
Cussu chi est su classicu apuntamantu aprontau de ""Sa mesa e' su primu mayu" s'at a tenni ocannu in su Centru culturali Lilliu de Barumini, cun d'unu programma meda arricu. S'ant a tenni dibbatidus, s'ant a fai proiezionis e contus. Su primu de su mes''e maju de sa mesa s'at a oberri a is 11.00 cun d'unu dibbatidu cordinau de Gian Luigi Deiana, chi at a tenni comenti argumentu "Mondo del lavoro in Sardegna. Il diario del saccheggio".
Unu grandu e importanti momentu de sa festa de Barumini at essi cussu de sa testimónia de unu traballanti de sa rebbellia de Rosarnu, a pustis de sa proiezioni de "La Valigia" de Tidiane Cuccu. A fin''e diri funt in programma una fibera de concertus cun sa participazioni, tra is àterus, de is Tzoku (ex Kenze Neke) e de Marco Rovelli.
In S'Asinàra ant essi prus de 800 is ànimas chi ant a passai sa diri cun is operàjus de sa Vinyls chi ocupant de prus de duus mesis su presoni de s'isola.
At essi afestau in veci cun sa bandera de s'indipendentismu de sinistra su "1 de Maju de sos traballadores" aprontau de A Manca pro s'Indipendentzia in Frodonjànus cun s'agiudu de s'amministrazioni comunali. In programma, a is 10.00, ddoi est unu dibbatidu po fueddai de sa chistioni de su traballu cun sa participazioni de s'imbasciadori nazionali Cristiano Sabino. "Po totu sa diri - si ligit in d'una nota - artistas e artesanus ant a traballai cun is abbilesas insoru acumpangiaus de cantus, sonus e ballus sadrus". Puru in Frodonjànus sa Festa at a finiri in música, cun is concertus de diversus grupus, comenti is Stranos Elementos e Brigata Klandestina.
Su primu de su mes''e maju at essi afestau in numerosus logus in totu s'Isola: Thiniscòle (Sardinia Mob Fest), Nùgoro (zona industriali Pratu Sadru), Sestu, Tadasune (cun su concertu de Enzo Favata). Totu in nòmini de sa música at essi su "Primo maggio terralbese" cun prus de 10 band chi s'ant a alternai in su palcu e cun su Djset de Mauro Murru e Alex Fanari.