Palomba (Idv): "Alleànzia unia po sa bitória. S'atóbiu regionali decidit po is provìnzias. Cugusi isfidat a Milia?

(IlMinuto) – Casteddu, 13 de su mes''e arbili - A pagus oras de sa cuferénzia de presentazioni de is candidaus de su Pd in is primarias po is elezionis de sa fin''e su mes''e maju - annuziada po custumerì a is 17.00 - su centrusinistra sadru parrit torra uniu. Pruschetotu - si s'interpretamentu de is fueddus scritus domìnigu de Federico Palomba po sa fini de s'atóbiu de s'Esecutivu regionali Idv chi s'est tentu in Santa Justa est giustu - su partidu de Di Pietro parrit cuillai is arrefudus a candidaduras chi ant fattu chistionai, comenti cussa de Graziano Milia po sa provìnzia de Casteddu (aundi su consilleri comunali de Casteddu de su Pd - elìgiu in su Prc - Claudio Cugusi, at in su trastempus arregortu is firmas útilis po podi presentai sa própriu candidadura a is primaris).
"A s'unanimidadi - scririt su parlamentari sadru - esti stetia pigada una decisioni: Italia dei Valori, cun su sensu de responsabbilidadi chi dd'at donau s'eletorau comenti partidu de alleànzia e in s'arrispetu de su própriu impreu, at a sighiri finzas a fundu s'obbietivu de mantenni unia s'alleànzia de centrusinistra cali elementu importanti po sa bitória".
Una línia chi s'Esecutivu regionali Idv imponit a is capus mannus de sa formazioni política in is provìnzias.
S'"atóbiu regionali" - scririt Palomba - est s'"ùnica sedi idonea a pigai is decisionis e a mantèniri is impignus pigaus, impignus chi no podint essi cambiaus o isciasciaus de is realidadis provinzialis".