Línguas strangeras: cumenzant is cursus líbberus po totus cussus chi bivint in Sardigna

(IlMinuto) - Casteddu, 13 de su mes''e arbili - Cumenzant is lezionis líbberas de línguas strangeras po totus cussus chi bivint in Sardigna. In su situ de su "Centro Linguistico di Ateneo" de s'Universidadi de Casteddu esti stetiu difatis pubblicau su bandu - promòviu de sa Regioni Sardigna - po participai a is cursus de Francesu, Portoghesu, Tedescu, Arabu, Cinesu, Russu, Italianu po is strangius e Ingresu.
Is lezionis funt de duus tipus: su primu, chi no at a biri s'Ingresu tra is línguas imparadas, tenit s'iscopu - cun cursus de 100 oras - de imparai a is iscritus is basis de sa língua segundu cantu istabbiliu de su "Quadro comune di riferimento europeo".
Su segundu tipu previdit cursus de 50 oras po istudiantis chi funt a metadi de imparu e po cussus chi conoscint beni sa língua. Custus ant a imparai totu su necessàriu po otèniri s'atestau Toefl (B2, C1 e C2) in Francesu, Spagnolu, Tedescu e Italianu po strangius.
Totus is lezionis s'ant a tenni in Casteddu. Ant a podi participai a is cursus is personas chi bivint in Sardigna e tenint tra is 18 e is 65 annus (puru immigraus), is istudiantis, cussus chi tenint un'assignu de istudiu, chini fait unu dotorau o fait unu master in s'Universidadi de Casteddu.