Domu: cunfirmau po su 13 s'isbarazu de sa família Giordi. Pichetu de solidariedadi nou

(IlMinuto) – Casteddu, 9 de su mes''e arbili - No ddoi est asséliu po sa família Giordi de Santu Juanni Sruexu. S'isbarazu de sa domu, crastinau de 2 de su mes''e marzu a su 13 de su mes''e arbili po mori de sa saludi pagu bella de su meri 'e domu Virgilio e grazias puru a su pichetu de solidariedadi de pagu prus de 70 ànimas, esti stetiu cunfirmau.
Sa domu - posta in béndida a s'incantu po mori de is dépidus familiaris - esti stetia pigada po pagu migliaja de eurus. Is Giordi - babbu in carrozina a pustis de un'ictus a su ciorbeddu, mamma e filla senz''e traballu, su fillu prus piticu istudianti - funt immoi circhendi de dda torrai a pigai cun d'una arregorta de dinai e faendi recursu a una finanziaria, ma sa diri sceberada po s'isbarazu est abbastànzia acanta. Sa meri 'e domu fait apellu a sa solidariedadi popolari, cun d'unu annúnziu fattu connosci in Facebook de Mario Flore, persona meda fracóngia. "S'isbarazu de su 13 de su mes''e arbili - acrarat - est cunfirmau. Cun s'arregorta de su dinai seus arribbaus a una cifrixedda e seus ancora abetendi s'arrespusta de sa finanziaria. Seus comenti sempiri cun s'àcua a su gúturu!".

"No si ndi scaresceus de sa família Giordi", scririt Flore. "Chini podit e chini bollit siat presenti a su pichetu de solidariedadi. S'apuntamentu est po martis 13 de su mes''e arbili a facc''e sa domu de Giordi in via Sannas a is 8.30, in su nùmeru 8".