"Continuità territoriale". Schirru (Pd): "Satisfazioni po s'impegnu de su Guvernu. Prus bolus po prézius prus bàscius"

(IlMinuto) – Casteddu, 22 arbili - "Est cun meda satisfazioni ca castiaus a s'impegnu pigau de su Guvernu de pigai in cunsidériu sa cundizioni de is sadrus chi s'agatant a bivi in d'un'Isola". Est cantu scririt sa parlamentari sadra Pd, Amalia Schirru, cummentendi s'aprou - de ariseru - de is mozionis Pili-Nizzi (Pdl) e Meta-Schirru (Pd) po sa "continuità territoriale".
"Si ponit fini a un'arrevesciori chi s'allonghiàt de meda tempus", comentat Schirru. "Fiamenti - precisat s'esponenti de su Pd - po sa Sardigna si pigat atu de su totali arreconnoscimentu de sa lei dèlega po su federalismu fiscali po sa "continuità territoriale" e sa moderna mobilidadi po totus is citadinus sadrus, chi funt a totus is efetus citadinus europeus".
 "A is cumpangias - concluit - at a benni pediu de fai tarifas noas e prus bàscias po is residentis in Sardigna. Ant essi asseguraus prus bolus e tarifas no prus artas de cussas ferruviarias".