"Con Remotti alla ricerca di Dio"

(IlMinuto) – Casteddu, 27 de su mes''e arbili - "Con Remotti alla ricerca di Dio" in d'unu viàgiu tra is religionis e is filosofias orientalis. Est custu su tema de s'ùltimu líbburu de Remo Remotti. S'òpera at essi presentada martis chi benit in Casteddu (19.00 Manàmanà) cun sa presénzia de s'autori, istudiosu meda bellu de sa matéria.
Su líbburu est unu donu chi su pintori, iscultori, poeta e atori - cunsacrau, in sa parti de Sigmund Freud, in "Sogni d'oro" de Nanni Moretti - dedicat a is prus giòvanus.
"Scéti cun s'istudiu e s'impunnada abbias de Deus, calisisiat deus - acrarat Remotti in d'una nota de imprenta - custus piciocus podint arribbai a su cumprendóniu, cumprendóniu necessàriu po diventai prus fortis e po bíviri in asséliu".
Própriu su cumprendóniu e sa disciplina - narat s'artista - funt is elementus chi dd'ant permitiu de arribbai a 85 annus senz''e depi renunziai a nesciunu de is ammàchius suus: s'arti, sa música, is féminas, su cínema, e s'istudiu.
"Dognia mangianu - narat - mi ndi pesu e andu in piscina, su sport est necessàriu. A pustis papu, no bufu e no apu mai bufau, no mi drogu e mi seu mai drogau. Aici tocat a fai po costruiri calincuna cosa".