Comitau po sa Territorialidadi de sa Pena: s'8 de su mes''e maju pichetu a fac''e su Consillu regionali. "Eus a donai is 3milla firmas arregortas. Seus stracus de fai passadissu"

(IlMinuto) - Casteddu, 29 de su mes''e arbili - 3milla firmas arregortas cun d'una mozioni popolari, presentadas de odg in is Provìnzias e in is Comunus de sa Sardigna, s'obertura de unu grupu Facebook cun 1450 iscritus.
Funt custus is arrisurtaus de su traballu ammutullonau de su comitau po sa Territorialidadi de sa Pena, nàsciu in s'atóngiu de su 2009 po denunciai s'acuntéssia de Bruno Bellomonte e po pediri ca is presoneris cundennaus o chi funt abetendi su giudíziu, iscontint sa pena in is presonis chi s'agantant prus acanta a is famílias insoru (segundu cantu previdit una lei de su 1975).
S'atividadi manna de su Comitau no est perou bastada a cumbinci chini de doveri a fissai un'atóbiu cun sa "Commissione Diritti Civili" in Consillu regionali. Mesis de abetu longu e inútili ant portau su Comitau a promòviri una manifestazioni in Casteddu po sàbudu 8 de su mes''e maju.
"Stracus de passadissus senz''e fini - si ligit in d'una nota de su Comitau - s'8 de su mes''e maju seus a movi po andai in Casteddu aundi s'at a tenni unu pichetu ainnantis de sa Regioni, in custa diri eus a donai is firmas arregortas, su frutu de su traballu de tantus amigus e cumpàngius".
"Bolleus - sighit su documentu - un'impignu beru e no promissas búidas o s'istituzioni de suta-Commissionis noas po sa cumparzidura de is cadiras e de is getonis de presénzia".