In Casteddu est torra apretu isbarazu. Zuncheddu: "Sa domu no est tra is necessidadis de su Comunu e de sa Regioni"

(IlMinuto) – Casteddu, 28 de su mes''e arbili - Torrat s'apretu domu. In is diris passadas s'agenzia regionali Area at difatis notificau una fibera de isbarazus chi ant a tocai prusatotu is abbitantis de is duus cuarteris prus popolaus e prus bisongiosus de Casteddu: Is Mirrionis e S. Elia. Ddu denunziat cun d'una nota su consilleri regionali e comunali de is Rossomori, Claudia Zuncheddu. Sa sardista de sinistra castiat a is responsabbilidadis de sa Regioni e de su Comunu de Casteddu.
"S'apretu domu in Casteddu - precisat Zuncheddu - est curpa de s'ausenzia de atenzioni de parti de is istituzionis chi no castiant a sa chistioni de s'edilizia púbblica residenziali: scéti su fattu ca in Casteddu, nononstanti sa dimanda apretosa, no ddoi siant assignaduras de duus annus (forsis tra pagu tempus ant a benni donadas 20 domus!) dda narat longa - sighit s'esponenti de is Rossomori - e is millionis de eurus chi si podint spendi po afrontai s'apretu, ant a podi essi impegnaus po pigai de su mercau de is domus apartamentus líbberus in totus is cuarteris de sa citadi, meda de prus po recuperai is propiedadis chi ddoi funt giai".