Traghetu Terranòa-Civitavecchia de su 20 de su mes''e marzu: clientis arrapignaus de sa gabbina po fai postu a is manifestantis de su Pdl a sa bia de Roma? Sa testimónia de su curridori

(IlMinuto) – Casteddu, 31 de su mes''e marzu - A prus de dexi diris de su viàgiu de su traghetu Terranòa-Civitavecchia de su 20 de su mes''e marzu funt giai casi milla is clientis iscritus a su grupu Facebook nàsciu cun s'iscopu de "donai boxi a totus cussus arrapignaus, cun pagu cuscénzia, de is diritus insoru, e de is próprius gabbinas. Gabbinas pagadas de meda tempus primu, ma liadas po essi donadas a is tesseraus de su Pdl chi furiant andendi a Roma po sa manifestazioni" de 21 de su mes''e marzu. Su grupu, lamau "Traghetto Olbia- Civitavecchia Snav Tirrenia - utenti scippati dei diritti", bollit "arregolli testimónias e bollit denunciai cussu chi est acontéssiu".
Sa Tirrenia 'e totu - segundu cantu scritu in su social network de su giornalista Giovanni Runchina de Radio Sintony - "at amitiu su dannu a su serbíziu mancau" donendi perou is curpas a su guastu de su "sistema informaticu in s'inzénneru de is billetus".
Si is iscritus a su grupu sfiorant su migliari, a immoi scéti unu clienti, s'atleta Paolo Floris, contat su própriu disdíciu.
"No iat tenni motivu de m'esponni aici - afirmat Floris, cussu merì in viàgiu po Civitavecchia po participai a una maratona - si totu custu no fessit beru.
Isperu ca puru is aterus fazant su própriu e alloghint su billetu comenti apu fattu deu. S'ant liau unu diritu nostru, senz''e contai ca chini nd'at aprofitau siat de destra o de sinistra".