Tàtari: cundizionis drammàticas in via Bottego. In s'ex asilu de Latte Dolce si bivit "tra topis e arpaus"

(IlMinuto) - Casteddu, 17 de su mes''e marzu - "Pipius costrintus a bivi in d'unu logu cun pérdidas de àcua in is filus de sa currenti, murus de mesu chi nd'arruint, pabimentus movius po mori de sa pesadura de sa fogna, topis e arpaus aintru de is domus". Est custa sa cundizioni in sa cali bivint de annus is personas de s'ex asilu de via Bottego, in su cuartieri de Latte Dolce, in Tàtari, segundu cantu denunziau - cun medas fotografias - cun d'unu comunicau arribbau in sa mail de IlMinuto. "Seus dispraxius - iscririt in d'una nota Pietro Serra - poita in totus custus annus no s'est moviu nesciunu po agiudai custa genti. Intrai aintru de custu logu esti stetia una cosa tra is prus malas de cantu si possat pensai. Calincunu pipiu, su prus piticu tenit scéti dexi mesis, depit bivi in d'unu logu chi est perigulosu e chi puru is Vigili de su Fogu ant declarau in custu modu. Funt passadas tres amministrazionis comunalis, perou totu est abarrau comenti fiat".
"Apu biu - sighit Serra, capu mannu de s'associazioni Gioventù Cristiana - cosas chi no podint essi contadas. Genti chi in domu teniat unu gatu po pigai is topis, genti chi, po si sciacuai, at depiu callentai s'àcua in ampuddas de pràstica".