Su decretu "SalvaAlcoa" est lei. Oi in Roma protestant 200 traballantis de s'Euroallumina

(IlMinuto) - Casteddu, 18 de su mes''e marzu - Sa vertenza Alcoa fait un'ateru passu ainnantis. Ariseru sa Camera at difatis cunvèrtiu in lei - cun 466 votus a faori e 4 astènius - su decretu chi previdit prézius po sa currenti iscontaus po s'istabilimentu de Portovesmi. Sa multinazionali est perou ancora abetendi de podi cumenzai e dd'at a podi fai a pustis de su pragoni de sa Commissioni europea. In su trastempus sighit sa mobilitazioni de is traballantis de un'ateru istabilimentu de su Surcis. Pagu prus de 200 traballantis de s'Euroallumina ant a manifestai difatis custu merì in Roma, po pediri de torrai a cumenzai sa produzioni, in ocasioni de s'atóbiu tra sa multinazionali russa Rusal, meri de s'istabilimentu, e su Guvernu. S'atóbiu est prevìdiu po cust'apustibràngiu in sa sedi de su Ministeru de su "Sviluppo economico".