Sinistra e Libertà: "Sa Regioni Sardigna depit comporai is aziendas chi funt in crisi e depit tutelai su traballu"

(IlMinuto) - Casteddu, 19 de su mes''e marzu - Sa Regioni Sardigna depit comporai is impiantus industrialis chi funt in crisi o cussus chi no funt prus funzionendi e chi "funti stetius incarreraus o ant pigau dinai pubblicu" po fai torrai a cumenzai is produzionis e po salvai is postus de traballu chi funt a arriscu. Est cantu previdit una proposta de lei presentada in is diris passadas de is rapresentantis de Sinistra e Libertà in Consillu regionali. Sa proposta de su movimentu de Nichi Vendola tenit s'iscopu - ispiegat s'artículu 1 de sa norma - "de defèndiri is produzionis industrialis chi funt ancora fortis, s'agatant in d'unu stadu de crisi istraordinàriu o no funt prus funzionendi poita funti stetias portadas in ateras regionis europeas o foras de Europa, e is postus de traballus insoru".
In is ùltimus annus difatis funti stetius migliaja is postus de traballu pérdius po mori de sa tràmuda de is produzionis in logus chi tenint unu costu de su traballu prus bàsciu: de s'arrobba de sa Legler a s'agrualimentari de sa Unilever. Immoi currint su própriu arriscu puru is traballantis de sa Rockwool de Igrèsias: sa multinazionali at difatis decídiu de movi is impiantus in Croazia.
Sel proponit de donai finanziaméntus po 50 millionis de eurus a s'annu de donai a sa gestioni de sa Sfirs, sa finanziaria regionali a sa cali sa proposta de lei fidat s'impreu de fai crobus.