Sanidadi in S'Alighera: sa dinúnzia de is associazionis: "Liaus dexi millionis a is cassas po s'ispidali nou"

(IlMinuto) – Casteddu, 12 de su mes''e marzu - "No seus de acórdiu cun s'assessori regionali de sa "Sanità" Antonello Liori, chi in d'un'intervista de pagu tempus fait, a pustis de un'atóbiu in Tàtari, iat arremaciau sa proposta de fai un'unica azienda de ispidalis in su tataresu". Est cantu afirmant cun d'una nota is associazionis de basi de sa citadi catalana: su Comitau po s'ispidali Nou de S'alighera, is associazionis de volontariau, is comitaus de cuartieri e de is burgus. Su mundu de is associazionis de su centru catalanu, est prontu a defèndiri s'autonomia de sa sanidadi de sa própriu citadi, e no tenit intenzioni de acetai sa possibbilidadi cuncreta de pèrdiri is 10 millionis de eurus chi furiant stetius assignaus po s'ispidali nou. Est po custu chi s'est aprontau po lùnis chi benit (18.30, saba Cuferénzias "SS. Nome di Gesù") un'atóbiu-dibbatidu chi tenit comenti tema "La migliore opportunità per conquistare la sanità del territorio".
"A custu puntu - precisat su comunicau de is associazionis de basi - no cumprendeus prus si (ndr: s'assessori Liori) bollit diaderus un'ispidali nou o chi bollit in veci un'ispidali "aconciau". A duas cidas de s'atóbiu de s'assessori Liori in citadi - dinunziant is associazionis de S'alighera - is millionis de su bilànciu regionali donaus po s'ispidali nou funt abasciaus de 60 a 50".