Matratamentu contra a is féminas. S' isperta in su cunvegnu Lions: "Depeus dinunziai sempiri su sfloradori"

(IlMinuto) - Casteddu, 8 de su mes''e marzu - "In is istadus de s'ocidenti industriali unu númeru de féminas chi andat de su 20 a su 30 po centu est sugeta a matratamentus de parti de su própriu cumpàngiu o ex cumpàngiu". Est cantu at nau s'abbogau Pier Andrea Setzu in sa relata chi at obertu su cunvegnu "Insieme contro la violenza sulle donne", chi s'est tentu cenàbara in sa saba de su Consillu de su comunu de Sìnnia. Custu númeru scéti bastat forsis a donai un'idea de s'istérrida de su fenómenu afrontau in s'iniziativa aprontada de is Lions. Una crupa chi, in su 2010, podit ancora essi sugeta a processu scéti si benit dinunziada de sa persona oféndia.
S'atóbiu, guidau de Valeria Garofalo de sa Commissioni "Cambiamenti sociali e nuove forme di violenza" de is Lions, at permitiu de cunfrontai is diversas esperiénzias. Sa psicologa Maria Teresa Portoghese, chi fait parti de sa Commissioni "Pari Opportunità" de sa Regioni Sardigna, at esaminau is modellus culturalis proponius de sa sociedadi e sa "malesa chi si portat acora sa comunicazioni".
Sa timoria de dognia fémina primu de decídiri de dinunziai is matratamentus esti stetiu su tema de sa relata de Antonia Fresu, Tenenti de sa Pulizia Giudiziaria, chi at pigau comenti esémpiu sa piciochedda sbuzarrada de unu ziu. "Dinunziai sempiri - at nau - est s'unicu modu po lotai contra a is matratamentus de is féminas".