Cunsórziu de Bonífica de Aristanis: arriscu po 200 postus de traballu e s'àcua po sa massaria de sa Províntzia

(IlMinuto) – Casteddu, 30 de su mes''e marzu - "Una política regionali cun is ogus tupaus at postu in crisi su Cunsórziu de Bonífica e, de cusseguénzia, totu su cumpartu de sa massaria de sa zona de Aristanis". Est cantu ant denunciau is traballantis de s'Enti chi ariseru ant prenu su Consillu provinziali de Aristanis in ocasioni de un'assembrea dedicada a cust'apretu. Is 20 millionis de eurus de "espozione bancaria" de su Cunsórziu ant a podi portai a sa serradura, a dannu de sa massaria, de s'àcua in su períodu de prus manna produzioni.
In s'atóbiu ddoi furiat sa Provìnzia de Aristanis, cun su presidenti Pasquale Onida, is assessoris Renzo Coghe, Pierfrancesco Garau e Mario Matta, unu nùmeru mannu de consilleris provinzialis, is sindacaus e is associazionis de categoria, mentris esti stetia precisada ancora una borta s'ausenzia grai de is consilleris regionalis elìgius in su territoriu.
"Is chistionis de su Cunsórziu - si ligit in d'una nota - si funt aggravadas in su tempus, po mori de is prézius chi no si podint prus arrelatai scéti cun is pagamentas (...) de is massajus e cun intradas ausentis (...) chi dipendint de is centralis idroeletricas, de sa diga e de sa riserva de s'àcua controllada de s'Enas".