Chistioni Bellomonte. A Manca pro s'Indipendentzia: "Bollint fai de Bruno unu buratineddu cunfundiu e ammachiau"

(IlMinuto) – Casteddu, 16 de su mes''e marzu - "Chini est in A Manca, e ancora de prus is dirigentis mannus de su movimentu, scint meda beni ca s'essi parti de formazionis políticas italianas de dognia tipu est dessintotu in contraddizioni cun sa militanza indipendentista". Aici su Diretivu políticu nazionali de A Manca pro s'Indipendentzia cummentat is fueddus chi at usau su Tribbunali de su "Riesame" de Roma po donai una spiegazioni a s'arrefudu de sa dimanda de spresonamentu po Bruno Bellomonte, presoneri de noi mesis in su presoni de Sianu, Catanzaru, de su mes''e làmpadas de su 2009. "A sa luxi de su cuntatu tra Bellomonte e Fallico - iscrit su Tribbunali de su "Riesame" romanu - e de su tipu assolutamenti claru de is arréxonis intercetadas, sa militanza de Bellomonte in creazionis autonomistas (atividadi chi de fatu iat at depi essi lícita) parrit piusaprestu dispintai cun forza sa participazioni de s'indagau in s'amigànzia pagu pulia batacollada in sa parti B2.
"Is magistraus de su Tribbunali de su "Riesame" - afirmat su comunicau de A Manca - arragollint in prenu is tesis de su Pm Saviotti e afacilant sa dignidadi de sa militanza de Bruno circhendi de ndi fai unu buratineddu cunfundiu e ammachiau".
"Is militantis de aMpI - precisat su Diretivu políticu de A Manca - no podint tenni dópias militanzas, no podint fai parti de ateras organizzazionis políticas e ancora de mancu podint addiriri a organizzazionis chi no riconoscint s'abbisóngiu de sa lota de libberazioni nazionali e soziali (...). A Manca tenit una línia e unu Statutu e ddu su fait arrespetai cun firmesa".
S'acusa at de pagu tempus serrau is spricullitus a carrigu de Bellomonte. Immoi at essi su Gup a decídiri si ddoi funt is cundizionis po su rinviu a giudíziu e su sbodicamentu de su processu.