Casamatta cambiat logu. Sa presidenti Asarp Gisella Trincas: "Agiudaisì a agatai unu logu nou"

(IlMinuto) – Casteddu, 2 de su mes''e marzu - Casamatta circat domu. Su progetu chi de 15 annus Gisella Trincas, presidenti de s'Unasam e de s'Asarp, mandat ainnantis cun s'obbietivu de agiudai in modu reali is personas chi s'agatant in stadu de suferénzia mentali a "si torrai a pigai sa vida" circat unu logu nou. "Depeus cambiai su logu de Casamatta - si podit liggiri in s'annúnziu pubblicau de Gisella Trincas in Facebook - agiudaisì a agatai domu: tres càmaras dópias, duas síngulas, salonis po unu totali de 50 metrus cuadrus, coxina, duus bàngius, bàngiu de serbíziu, pórcius e terrazus o mellus ancora giardinus. Po una spesa no prus arta de 1500-2000 eurus a su mesi".
A oi sa domu de Cuartu Sant'Alèni aghillit otu personas: cincu féminas e tres óminis. "Sa filosofia chi animat sa domu - si podit liggiri in d'una nota - est cussa de agiudai is personas in sa vida de dognia diri nonostanti sa suferénzia e s'apretu. E funzionat!".
Sa decisioni de cambiai su logu de Casamatta est una decisioni de is diris passadas, e esti stetia pigada poita - at scrittu Trincas - "su Comunu de Cuartu Sant'Alèni, inzuzulau de s'assessorau regionali de sa 'Sanità' bollit torrai a ponni in discussioni su pragoni chi firmàt s'incriamentu de sa Domu, e bollit fai custu nonostanti seus abetenti su giudíziu de su Tar".