"Una fémina dognia tres benit corpia de matratamentus". In Sìnnia unu cunvegnu de is Lions po chistionai de "un'apretu senz''e làcanas"

(IlMinuto) - Casteddu, 23 de su mes''e fiàrgiu - "Impari contra a is matratamentus de is féminas. Isperas e esperiénzia si cufrontant". Est custu su tema de su cunvegnu aprontau de is Lions de Sìnnia po su 5 de su mes''e marzu (16.30, saba de su consillu). "Una fémina dognia tres benit corpia de matratamentus - si podit liggiri in d'una nota chi presentat s'atóbiu - e custu bollit nai ca scéti su fattu de essi fémina est unu perígulu meda mannu. Est un'apretu chi corpit totu su mundu e chi tocat a totus, senz''e tenni làcanas politicas, culturalis e fisicas". Su cunvegnu, chi at a biri sa presénzia de spertus e de personalidadis pubblicas de su logu, at essi guidau de Valeria Garofalo, presidenti de sa Commissioni "Lions Club Sinnai", e at esaminai su tema "Cambiamenti sociali e nuove forme di violenza". "Su cunvegnu - ispiegat Garofalo - est unu primu momentu de unioni e cunsidériu de sa cultura chi arrefudat totugantus is matratamentus. Eus dezidiu de dda disignai cun is esàminus de medas spertus, sendu custu unu fenómenu chi tenit millas facis".