S'isfida de is Rossomori a su centrusinistra de Cuartu Sant'Alèni: segai cun sa casta e torrai a partiri de sa participazioni

(IlMinuto) – Casteddu, 10 de su mes''e fiàrgiu - A pagu mesis de is elezionis comunalis is Rossomori de Cuartu Sant'Alèni imbolant un'isfida a totus is forzas de su centrusinistra de sa terza cittadi de sa Sardigna: segai cun is "fèudus familiaris" e cun is interessus de sa casta po torrai a partiri de is cittadinus, de is bideas insoru e de is bisóngius insoru. Cun custu obbiettivu su círculu Rossomori de Cuartu Sant'Alèni - de oi intitulau a s'intelletuali de sa nazioni sadra Eliseo Spiga - avisat ca po cida chi benit (data de istabbiliri) s'at a tenni un'assembrea popolari cun sa participazioni de is cittadinus e de is esponentis de is forzas politicas "progressistas, nazionalitarias e indentitarias" po fai su bilànciu de s'esperiénzia de guvernu de is ùltimus cinc'annus. Su giudíziu de is Rossomori est esprimiu cun claresa in d'una lítera oberta mandada in is diris passadas a is partidus de su centrusinistra: is sardistas de sinistra criticant màssimu sa mancànzia de democrazia e de participazioni in sa gestioni de sa cosa pubblica. "Bolleus ca is cittadinus siant po una borta is verus protagonistas de sa politica - narat s'ex consilleri comunali Sergio Falconieri - in sa vitória o in sa derrota. No si podit gestiri s'apretu de su traballu cun is praxereddus". "Cussu chi at guvernau po cinc'annus a Cuartu - precisat Tullio Cipriano de sa segreteria cittadina - no esti stetiu unu guvernu de centrusinistra. Nosu no s'eus a acapiai cun chini no si fait un'esàmini de cuscénzia. No s'eus a acumonai a sa finta politica de su centrusinistra, cun s'abbétia de una casta chi tupat sa buca a chini no fait parti de su 'casteddu'". Aspetenti s'assembrea popolari de cida chi benit is Rossomori donant apuntamentu a is cuartesus po sàbudu 13 de su mes''e fiàrgiu (17.00, saba Michelangelo Pira) po sa presentazioni de su liburu de Eugenio Campus "Il pettine senza denti", un'eventu dedicau a Valery Melis e a tutus is vitimas de s'uraniu "impoverito".