Sbarazzu de Giorginu. Sa comunidadi senegalesa: "Ospidàgius catulicàtuli. Senz''e residénzia no ant essi annovaus is permissus po podi abarrai in Italia". Sit in su 18 de su mes''e fiàrgiu

(IlMinuto) – Casteddu, 15 de su mes''e fiàrgiu - "S'ant bogau de Giorgino narendi ca si staiat mali, ca is domus furiant arruendi a arrogus e narendi ca furiaus abbusivus, puru si teniaus unu cuntratu. S'ant mandau in d'unu logu péjus". A pagu diris de su sbarazzu de s'ex Edem sa comunidadi senegalesa de Giorginu pigat su fueddu e narat sa beridadi cun d'una lítera oberta: una beridadi difarenti de cussa fatta connosci de s'amministrazioni comunali de Casteddu e de sa Caritas. "Nos senegalesus chi finzas a su 10 de su mes''e fiàrgiu eus biviu in Giorgino - si podit liggiri in sa lítera - faeus custa denúnzia po fai sciri a is italianus ca immoi seus in s'istrada po mori de su comunu de Casteddu e de sa Caritas. Nonostanti is promissas, de fattu totu nos chi teneus is documentus in régula no eus otentu un'atera domu e is ospidàgius funt totus provisórius e catulicàtuli". Po protestai contra a is responsàbbilis de su sbarazzu e de is cusseguénzias, sa comunidadi senegalesa de Giorgino at aprontau po gióbia chi benit a is 10.00 unu sit in a facc''e a sa sedi de su comunu de Casteddu in via Sonnino. "Tra is residentis in Giorginu (totus cun su permissu in régula po podi abarrai innoi) - spiegat sa comunidadi senegalesa - mancu sa metadi at tentu un'ospidàgiu in dognia modu provisóriu e pejoranti si castiaus a cussu chi teniaus primu. Calincunu est aposentau in sa Caritas, aterus in albergu e aterus ancora in domus a foras de sa cittadi afitadas de su comunu scéti po un'annu. Cussus chi abarrant, una carantina pagu prus, s'agatant a oi in Senegal e po custus no esti stetiu previdiu nesciunu ospidàgiu". No scéti, sa pérdida de sa residénzia arriscat de fai aplumbai una parti de is senegalesus chi biviant in s'ex Edem de Giorgino in s'"illegalidadi". "Chini tenit is documentus in iscadènzia immoi tenit su disdíciu de no tenni una residénzia (...). Aundi ant a agatai is domus in afitu biu ca is meris de domu faint sempiri prus chistionis a fai cuntratus a is immigraus?".