Sbarazzu de Giorginu. Cras in Casteddu su sit in de is traballantis senegalesus. C. Zuncheddu: "Ita at a fai su síndigu po agiudai su rinnovu de is documentus chi permitint a custa genti de podi abarrai innoi?"

(IlMinuto) – Casteddu, 17 de su mes''e fiàrgiu - "A pustis de su sbarazzu totus in istrada". Cras a mangianu a is 10 is traballantis de su Senegal chi biviant in s'ex Edem de Giorginu - primu de su sbarazzu de mérculis passau bófiu de su síndigu de Casteddu Emilio Floris - s'ant a agatai a facc''e sa sedi de su comunu de Casteddu de via Sonnino po unu sit in de protesta e de dinúnzia. "Nonostanti is promissas - si podit liggiri in d'una lítera oberta de sa comunidadi de is senegalesus de Giorginu - de fattu, totus nos cun is documentus in régula no eus otentu un'atera domu e is logus aundi s'ant postu funt logus provisórius e pagu segurus". In sa chistioni est intervennia, cun d'una interrogazioni apretosa "Po is dificultadis de sa comunidadi senegalesa a pustis de su sbarazzu de Giorginu", sa consillera comunali de is Rossomori Claudia Zuncheddu. "Calincuna de is personas chi ant agguantau su sbarazzu - precisat in su documentu sa sardista de sinistra - tenit totus is documentus in régula, ma custus documentus funt po iscadiri. Po mori de cantu acadessiu custa genti at a arriscai de no podi tenni sa dilazioni de su vistu po podi abarrai innoi, e custu est curpa de su fattu ca no tenint una domu de residénzia". Sa consillera pedit insaras a su síndigu Floris e a is assessoris cumpetentis "Ita bollint fai (...) po favorèssiri su rinnovu de is documentus de is senegalesus chi arriscant de no tenni su vistu poita s'agatant senz''e residénzia e (...) cali siant is iniziativas chi depint fai po allebiai s'istrobbu a is personas chi oi s'agantant in is territorius de nàscida (circa 40 immigraus cun residénzia in s'ex Edem funt immoi in Senegal, ndr) e chi candu ant a torrai s'ant a agatai senz''e una domu  e senz''e nudda po mori de su fattu ca cussu chi teniant essi stetiu 'destruiu, perdiu' o ateru".

Liggi s'interrogazioni:

http://www.ilminuto.info/notizia.php?id_notizia=1811

Liggi sa lítera de sa comunidadi senegalesa in Giorginu:

http://www.ilminuto.info/notizia.php?id_notizia=1788