Sa Sardigna narat no a dognia isolamentu. Cras a merì sa manifestazioni de sa "Rete Antirazzista Cagliari"

(IlMinuto) – Casteddu, 5 de su mes''e fiàrgiu - Nai "basta a su razzismu, a is isbarazus e basta a sa cassa in is istradas". Funt custus is obbiettivus de sa manifestazioni de sa "Rete Antirazzista Cagliari", chi cras a merì at a atobiai in su corteu chi at a partiri a is 15.30 de sa prazza de su "Carmine" po atravessai is vias de su centru cittadinu. Cun cust'iniziativa sa "Rete" bollit donai solidariedadi a is immigraus e bollit protestai contra a is isbarazus de is domus, chi si faint sempiri prus continus a dannu de sa comunidadi senegalesa. "In Casteddu e in is cuarteris lacanàntis - si podit liggiri in d'una nota - is forzas de s'ordini funt cumpudendi is domus de is senegalesus cun s'iscusa de circai is strangeris chi no funt in régula. Is senegalesus presentis in is domus forrogadas benint portaus in Cuestura po ddi si cuntrollai is documentus e benint traténnius finzas a 12 oras senz''e si podi ponni in cuntatu cun d'un'abbogau. Cussus chi no funt in régula benint a pustis processaus po 'diretissima' e ddi si benit donau unu fógliu po lassai s'Isola. Su fógliu balit cincu diris. A pustis de ai cumpudau in is domus, is cuntratus in régula benint annullaus e puru is senegalesus chi tenint is documentus in órdini s'agant senz''e una domu". Sa "Rete" fait claresa puru in su "Casu Giorginu". "A diferénzia de cantu iscrittu de L'Unione Sarda', s'istoria de is domus 'ocupadas' de is senegalesus de Giorginu est cumenzada - precisat su comunicau - cun d'un'aciocu giudiziariu po unu cuntratu de afitu ancora bàlidu e firmau dex'annus fait tra is senegalesus e un'umbràtili proprietariu. Is senegalesus no ant ancora arriciu s'avisu de isbarazu, ma funt in avértida, biu s'arrepènti interessamentu de su Cacip (chi narat de essi su proprietariu) po is domus". A sa manifestazioni de cras a merì at a participai puru s'associazioni Sardegna Palestina. "Nesciunu tretu - scririt s'associazioni - andat lassau a su razzismu istituzionali e a cussu chi si respirat puru in su populu. (...). De sa Palestina a s'Italia no depeus donai paxi a is razzistas". Su corteu at essi sighiu a is 20.00 de su merì de "Tutti i Sud del mondo. Musica clandestina contro il razzismo", eventu chi s'at a tenni in sa sedi de s'"Associazione Don Chisciotte" in via San Giacomo. Sa lota "contra a dognia razzismu" at a sighiri puru cida chi benit. Mércuris sa sedi Rdb/Cub at a aghilliri sa "Tavola contro il razzismo": un'atóbiu obertu a sa participazioni de is síngulus, de is associazionis, de is sindigus e de is partidus, cun s'iscopu de costruiri unu cordinamentu fissu de lota.