Sa Lega oberrit una sedi in Nùgoro e "aciungit" s'Isola a sa Padania. Crescit in Facebook su no sadru contra a su partidu de Bossi

(IlMinuto) – Casteddu, 1 de su mes''e fiàrgiu - "Sa Sardigna est un'isola in su centru de su Mediterraneu, regioni de sa Repubblica Padana": est cantu eus a liggi in is futurus manualis de giografia segundu is pianus de is dirigentis de sa Lega Nord, chi - a scusi de su populu sadru - ant aciungi sa Sardigna in sa mappa giografica de cussa chi lamant Padania, pubblicada in su situ istituzionali de su partidu. S'arrastru politicu de Bossi at giai allonghiau is próprius brazus asuba de sa Sardigna, oberrendi una sedi in Trinidade e Binzola in is primus diris de su 2009 - in custu centru su movimentu est su primu partidu - e a pustis in Ogiastra, in Tàtari e in Casteddu. Una sedi noa at essi oberta in is diris chi benint in Nùgoro. S'inaugurazioni est previdia po su 5 de su mes''e fiàrgiu, contemporaneamenti cun s'isciòpiru generali. Is fueddus de su cordinadori regionali de sa "Lega Nord Sardegna" Fabrizio Pirina espressant cun claresa s'"ideologia" de is leghistas sadrus. "Traballendi a tramuntana - narat Pirina a is mincrofunus de su Tg Nord - e bendendi sa faina de is padanus e de sa genti padana...iat essi su màssimu arrennèsciri a dda portai puru in Sardigna poita teneus una terra meda arrica chi no arrennesceus a sfrutai, mentris is padanus arrennescint a fai calisisiat cosa". Contra a su rexinamentu de su partidu de Bossi e Maroni s'est in veci fundau unu gruppu Facebook "Via la Lega Nord dalla Sardegna" chi at giai superau is 1400 iscrizionis in su social network. Cun s'opposizioni a s'invasioni de sa Lega in s'Isola su movimentu bollit nai no a su razzismu, a sa xenofobia e a s'azizamentu fascista de Borghezio e de totu cussa genti".