Sa "Federazione della Sinistra" si presentat a is cuartesus. Stocchino: "Udc e Psdaz a foras de sa coalizioni"

(IlMinuto) – Casteddu, 18 de su fiàrgiu - Sa "Federazione della Sinistra" torrat a cumenzai de is fundamentas. A pagus mesis de is elezionis amministrativas is comunistas cuartesus aghillint is cittadinus in s'assembrea-dibatidu in programma po sàbudu chi benit (17.00) in sa saba Michelangelo Pira. S'iniziativa - chi tenit s'iscopu de presentai su sogetu politicu federali nou, costituiu de Rifondazione, Pdci e Socialismo 2000 - esti stetia ammostada a sa stampa custu mangianu, in s'istorica sezioni comunista de via Eligio Porcu, in Cuartu Sant'Alèni, de su segretariu federali de su Prc de Casteddu e consilleri comunali de sa terza cittadi de sa Sardigna, Giuseppe Stocchino, e de s'assessori a su "Sport e alle politiche giovanili" Elisabetta Campus. Po s'apuntamentu cuartesu chi tenit su slogan "Per una sinistra unita... abbattiamo i muretti a secco", ddoi ant essi puru Bruno Steri (Direzioni nazionali Prc), Gianni Fresu (Segretariu regionali Prc) e Claudio Giorgi (segretariu regionali Pdci). A pustis de cinc'annus de Guvernu de sa cittadi, sa "Federazione della Sinistra" de Cuartu, e àncora de prus su Prc, parrint prontus a participai a una coalizioni noa cun su centrusinistra, chi nascit de programmas comunus, bofíus de totu sa coalizioni. Rifondazione pedit unu consideriu prus mannu po s'incarrigu de su Consillu comunali e una politica participada "chi seghit cun sa gestioni de is meris de su partidu". "O sa politica si riformat - afirmat Stocchino - o a elígiri su 'prinzipi noeddu' at essi una parti meda pitica de is cittadinus". De su segretariu federali de su Prc est arribbau puru unu no dizídiu po s'imbucada de s'Udc e de su Psdaz in sa coalizioni de centrusinistra.