Mps: pastoris prontus a sa mobilitazioni po su préziu de su lati . "Prato favorèssit is collegas industrialis de cuss''e totu"

(IlMinuto) – Casteddu, 1 de su mes''e fiàrgiu - "S'assessori a s''Agricoltura' Prato favorèssit is collegas industrialis de cuss''e totu a is pabas de is pastoris e de is cassas regionalis". Est cantu afirmat cun d'unu comunicatu stampa su "Movimento Pastori Sardi" a pustis de s'ùltima intesa tra sa Regioni e su "Consorzio Latte". "S'assessori Prato - narat s'esponenti de su Movimentu Felice Floris - s'est postu de sa parti de is industrialis, de cussa de is privaus e de cussus chi si funt unius in coperativa, chi de sempiri circant de pagai su lati de brebei a prézius medas bàscius. Immoi, cun sa complizidadi de s'assessore, parrit ca ci dd'ant a fai". Segundu Floris s'azioni est simpli. "S'assessori - spiegat su leader de su Mps - dezidit de ammenguai sa produzioni de su casu de su 15 po centu e de ammassai sa quota in prus in is magasinus de su Consorziu lati po dda torrai a ponni in su mercau in is mesis chi benint". "Perou - precisat s'Mps - "a prézius medas bascius po is pastoris". "Su Consorziu - narat Floris - po si lizai de su lati in prus dd'at a donai a prézius de pagu contu po totu s'Europa, ponendi in crisi is associazionis chi de tempus meda arrenescint a pagai su lati a is pastoris a prézius bonus. Su Consorziu no at a podi fai acitotu e at a scarrigai totu asuba de su préziu (basciu, ndr) pagau a is pastoris". "Is industrialis e s'assessori Prato - concluit Floris - ddu scint beni ca is pastoris sadrus no ant a permitti mai ca si fazat sa ruina insoru, po custu funt prontus a sa mobilitazioni generali".