Isciòpiru generali de sa Sardigna: in 50milla in Casteddu po nai no a sa crisi. Is operàjus de s'Alcoa: "No seus a arrendiri"

(IlMinuto) - Casteddu, 5 de su mes''e fiàrgiu - Sa "vertenza Sardigna" est calada in prazza. Funti stetias circa 50milla is personas chi ant participau in Casteddu a sa manifestazioni - sa prus manna in s'istoria de s'autonomia - boffia de Cgil, Cisl e Uil in ocasioni de s'isciòpiru generali regionali. No scéti sa chistioni gravi de s'Alcoa, difatis s'Isola at portau in istrada totu s'arràbiu e totus i lotas sozialis: de is precarius de s'iscola e de s'amministrazioni pubblica, a is operàjus de sa Vinyls de Pòrtu Turre, a is istudiantis, a is giòvanus chi no ant mai tentu unu traballu. Sa crisi est sciusciendi s'economia de totu s'Isola. Unu númeru bastat a donai un'idea de sa situazioni: scéti in su Surcis su númeru de is operàjus chi pigant is "ammortizzatori sociali" at de pagu tempus superau su númeru de cussus chi traballant. E a sa vida de s'Alcoa funt accappiaus 2milla postus de traballu de sa filera de s'allumíniu. De su palcu in prazza Yenne Susanna Camusso de sa Cgil at nau àncora no a sa cassa integrazioni po is operàjus de Portovesmi, decidius a "no s'arrenderi mai". "Is impiantus depint abarrai attivus - at nau - puru si si depit ponni unu cummussariu o si depit iscicutai s'azienda". Funti stetias medas is personas chi ant addiriu a s'isciòpiru, chi at biu sa partecipazioni de unu cordoni de indipendentistas aprontau de Ampi e Sni. Is Cobas de s'iscola ant inspainau una nota de critica. "S'at a praxi cumprendi - ant iscrittu - poita si decidit de manifestai 'totusimparicunamori', impari a is meris de Confindustria, cun is capus mannus de sa Crésia e no s'intendit nemancu s'abbisóngiu de arraxonai e de chistionai cun totus is organizzazionis chi lotant diaderus contra a sa bendida a prézius bascius de sa terra nostra".