Cuartu Sant'Alèni promovit su "piano occupazione": 100 postus de traballu po 5 mesis e 100 contribbutus po impresas noas

(IlMinuto) – Casteddu, 26 de su mes''e fiàrgiu - A pagu mesis de is elezionis amministrativas e a casi cinc'annus de guvernu, sa Giunta Ruggeri promovit su "Piano straordinario per l'occupazione giovanile". S'obbietivu de sa mazorànzia de centrusinistra est cussu de creai in Cuartu Sant'Alèni assumancu 200 postus de traballu nous. Cun casi 600milla eurus s'amministrazioni comunali at a pigai, po cincu mesis, 83 personas chi funt senz''e traballu, custas non depint tenni 36 annus d'edadi (36 laureaus, 33 diplomaus e 14 operàjus) e at a agiudai is impresixeddas de su territoriu a pigai aterus 17 giòvanus. S'amministrazioni cuartesa bollit puru creai assumancu aterus 100 postus nous de traballus cun is contribbutus "de minimis" po aviai impresas noas: ditas individualis, coperativas e soziedadis. Chini si bollit oberri un'impresa depit essi residenti in Cuartu Sant'Alèni e depit essi senz''e traballu candu fait sa dimanda. Custa genti at a podi aviai un'atividadi in su campu de su turismu, de s'artesanau, de sa massaria, de is serbízius e de su cummérciu. Chini bincit su cuncursu at a depi perou cofinanziai su progetu presentau cun d'unu peschentu chi crescit cun s'aumentu de sa summa pedia. De su 10 po centu pediu po unu contribbutu de 20milla eurus a su 40% po is cofinanziamentus tra is 60milla e is 75milla eurus.

Po ndi sciri de prus: www.comune.quartusantelena.ca.it