Costa (Cgil): "Is impiantus no si depint firmai: tocat a cummissariai s'Alcoa". Isciòpiru generali: 20milla in corteu

(IlMinuto) – Casteddu, 4 de su mes''e fiàrgiu - "Is impiantus no si depint firmai. Si Alcoa no est in gradu de garantiri su futuru de is istabilimentus est arribbau su momentu ca su Guvernu pighit una decisioni: cummissariai s'Alcoa e agatai una soluzioni industriali alternativa". Cun custus fueddus su segretariu regionali de sa Cgil Enzo Costa annunziat cussu chi pensat sa Cgil, e at essi cun custa proposta chi s'at a presentai in su s'atóbiu tra sa multinazionali de s'allumíniu e su Guvernu in programma po s'8 de su mes''e fiàrgiu. "Sa seguresa chi sighit a pediri Alcoa - narat Costa - parrit prus un'iscusa, no parrit po nudda una cundizioni, sa cundizioni chi dd'at a depi permiti de sighiri sa produzioni in is istabilimentus de Portoscuso e Fusina. Sa Cgil at a sighiri a sustenni sa lota de is traballantis cun s'isciòpiru generali de sa Sardigna de su 5 de su mes''e fiàrgiu". Segundu su càlculu de is segretarius regionalis de Cgil, Cisl e Uil cras ant essi assumancu 20milla is personas chi ant a participai a su corteu aprontau de is sindacaus confederalis a ot'annus de s'ùltimu isciòpiru generali. Is manifestantis - precisant is organizzazionis sindacalis - ant a arribbai in Casteddu cun 200 pullman e 1500 automóbbilis.