Caligaris (Sdr): riforma de s'iscola superiori, est nezzessaria una campagna de informazionis de parti de sa Regioni

(IlMinuto) - Casteddu, 1 de su mes''e fiàrgiu - "Is babbus e is mammas de is piciocheddus chi depint scioberai s'iscola superiori no conoscint is medas noas introdusias cun sa riforma de is iscolas superioris, perou is iscrizionis a is cursus nous ant a principiai su 26 de su mes''e fiargiu chi benit po finiri su 26 de su mes''e marzu". Ddu dinùnziat cun d'una nota sa presidenti de s'Associazioni Socialismo Diritti Riforme" Maria Grazia Caligaris. "Custa situazioni - narat s'esponenti de is socialistas - pedit un'impegnu estraordinariu de parti de sa Regioni. Est difatis indispensabili poniri in attu unu gruppu de traballu chi fazzat de ponti cun is iscolas medias po ammostai is noas. Ddoi est difatis s'arriscu ca is isceras siant fattas senz''e castiai a custas cosas". "Is iscolas tennicas, po fai un'esempiu, - arregordat Caligaris - ant a passai de is 39 indirizzus de oi a 11 indirizzus, chi funt aprontaus in duus campus: economicu e tennicus cun ateras ispecialidadi. Cussa professionali at a passai de is 27 indirizzus de oi a 6 indirizzus. Puru is liceus ant diventai 6. In totus is iscolas est previdia una diminuzioni de is oras de lezioni".