Ausénzias in Consillu regionali. Zuncheddu (Rossomori): "Operazioni mediatica de sa presidenti Lombardo"

(IlMinuto) – Casteddu, 4 de su mes''e fiàrgiu - "S'elencu de is ausénzias de is consilleris regionalis, pubblicau de sa stampa in is diris passadas, no currispondit a sa beridadi: est un'operazioni mediatica de sa presidenti Claudia Lombardo". Est cantu dinunziat cun d'una nota sa consillera regionali de is Rossomori Claudia Zuncheddu. "Sa renúnzia a su votu comenti azioni politica de is consilleris de s'opposizioni - scririt Zuncheddu - esti stetia cunsiderada ausénzia de is traballus de su Consillu. Est su casu, po fai un'esémpiu, de is continuas dimandas de berífica de su nùmeru legali fattas de su centrusinistra. Usu custu chi serbit po arregordai sa responsabbilidadi chi tenit su centrudestra de guvernai, centrudestra chi su prus de is bortas no est in gradu de assegurai su nùmeru legali po mori de is ausénzias de is próprius esponentis in is traballus de s'àula". " In custus casus - sighit s'esponenti sardista de sinistra - su 'no votai' de is consilleris de centrusinistra no benit cunsiderau de sa presidenti Claudia Lombardo un'azioni politica e democratica de disacórdiu, ma una simpli ausénzia. In custu modu est possíbbili ca is consilleris de s'opposizioni resultint ausentis puru cincu o binti bias in sa própriu seduta, perou faendi custu contu no si pigat in cunsidériu s'attividadi chi faint in àula". Po fai un'esémpiu, in 89 atóbius Claudia Zuncheddu - si podit liggiri in su comunicau - esti stetia ausenti scéti su 24 de su mes''e cabudanni e su mangianu de su 10 de su mes''e paschixèdda, ma "in sa stampa funti stetias pubblicadas 118 ausenzias (33,91 po centu). Est custa informazioni currigia e beridera?".