Alcoa narat no a su Guvernu e cunfirmat sa cig. Totu s'arrénnegu de sa Sardigna in s'isciòpiru generali de su 5

(IlMinuto) – Casteddu, 3 de su mes''e fiàrgiu - Est acabbau a is duas de su notti s'atóbiu Guvernu-Alcoa, e s'est concludiu àncora cun d'unu no de parti de s'azienda. Un'ateru atóbiu tra Guvernu e azienda at essi convocau po s'otu de su mes''e fiàrgiu in Palazzo Chigi. Sa multinazionali arrefudat is garanzias donadas po is prézius de s'energia e est pronta a firmai is istabilimentus italianus e a aviai sa cassa integrazioni a partiri de su 6 de su mes''e fiàrgiu. Susanna Camusso de sa Cgil pedit a su Guvernu de assegurai sa produzioni e chi est nezzessariu pedit de scicutai sa fàbbrica. Oi totus is operàjus ant a furriai in Portovesmi po ocupai is istabilimentus. Est in custu clima ca sa Sardigna s'acostat a s'isciòpiru generali de su 5 de su mes''e fiàrgiu convocau de Cgil, Cisl e Uil. Is sindacaus "sighendi cantu giai nau in s'assembrea de is rappresentanzas de su populu sadru su 6 de su mes''e totussantus de su 2009 - si podit liggiri in d'una nota - retenint nezzessariu unu progetu popolari forti po cuntrastai custa crisi chi corpit in modu légiu prusatotu is traballantis, is precarius e is pensionaus de sa Sardigna, po torrai a donai luxi a s'Isola, po pediri unu "Piano di Rinascita" nou aundi ddoi siat s'arreconnoscimentu de s'insularidadi". Su corteu at a cumenzai a is 9.30 in prazza Giovanni XXIII po acabbai in prazza Yenne. Sa manifestazioni at tentu numerosas addisionis, nonostanti is medas criticas a is sindacaus confederalis, comenti cussas arribbadas a IlMinuto de A Manca pro s'Indipendentzia e Sardigna Natzione (chi ant a donai vida a unu corteu indipendentista), de su "Coordinamento precari della Scuola" de Aristanis de sa "Confederazione sindacale sarda". No at participai a s'isciòpiru s'Irs de Gavino Sale.