Traballantis de s'Alcoa: Casteddu-Roma scéti andada. "No eus a torrai in Sardigna senz''e sa zertesa de su traballu"

(IlMinuto) - Casteddu, 29 de su mes''e gennargiu - "No eus a torrai de Roma senz''e sa zertesa de torrai a pigai sa produzioni de allumíniu in Portovesmi". Est cantu ant nau is traballantis de s'Alcoa de Portovesmi candu ant lassau s'aeroportu de Casteddu a pustis de s'annùnziu fattu de su prefettu de Casteddu Balsamo po un'atóbiu nou in Roma tra s'azienda e su Guvernu su 2 de su mes''e fiàrgiu. In su cursu de su mangianu is operàjus de s'Alcoa iant isfundau su cordoni de is forzas de s'órdini e ant occupau s'aeroportu de Casteddu po fai un'azioni estrema de protesta contra a sa cassa integrazioni e a sa serrada de s'istabilimentu po ses mesis, cosas chi annunziant sa serrada de s'istabilimentu. Sa lota de is operàjus de s'Alcoa est sa lota po salvai migliaja de postus de traballu in d'unu territoriu cun d'unu númeru meda mannu de personas senz''e traballu. "Sa Fiom - narat Giorgio Cremaschi in d'una nota - espressat solidariedadi a is traballantis de s'Alcoa chi in custas oras lotant po fai cumprendi a totu s'Italia ca s'est serrendi una fàbbrica, chi at a lassai 1500 personas in mesu a s'istrada".