Rossomori: "No eus a lassai Cuartu a su sparziméntu de is feudus familiaris"

(IlMinuto) – Casteddu, 22 de su mes''e gennargiu - "Assisteus ancora a s'ispettaculu chi si bidit primu de is elezionis, s'ispettaculu politicu de is bacas. Totu est in línia cun su sólitu teatru de sa politica cuartesa: apicigaus a su poderi e a is clientelas comenti si sa cittadi fessat 'cosa insoru/cosa nostra' e indiferentis a su beni de totus". Funt meda grais is fueddus sceberaus de su círculu Rossomori Michelangelo Pira po dinunziai su stadu de sa politica in Cuartu Sant'Alèni - sa terza cittadi de sa Sardigna po nùmeru de abbitantis - a pagus mesis de is elezionis comunalis. "Custu abbituali e miseru modu de fai - si podit liggiri in su comunicau stampa de su movimentu sardista de sinistra - at (...) stresiau is cittadinus de sa politica e de sa partecipazioni democratica, lassendidda in is manus de pagu genti, in is manus de is 'prinzipales', is manus de is feudus de família (...). Est tempus de cambiai, is Rossomori ant a lotai cun is cuartesus po fai in modu ca sa partecipazioni in politica torrit in is manus de chini dda meritat: is cittadinus de Cuartu. Totus impari no eus a permitti ca, ancora una borta, sa cittadi bengat spartia po mori de is interessus de is castas de calisiòllat colori".