Pranus "ad personam" po personas diversamenti abilis: s'opposizioni narat no e pedit 28 milionis de eurus po sa lei 162 de su 1998

(IlMinuto) - Casteddu, 15 de su mes''e gennargiu - "Liai dinai a is personas diversamenti abilis est una brigungia. Custa est una Giunta senz''ideas, chi no castiat a is interessus de sa Sardigna". Est cantu at nau su consilleri regionali de su Pd, Mario Bruno, in su cursu de una cuferénzia stampa convocada ariseru in Casteddu po nai no a sa diminuzioni de milla eurus po is pranus personalis destinaus a is personas chi tenint handicap gravis (lei nazionali 161 de su 1998). Is rappresentantis de s'opposizioni in Consillu regionali ant presentau una mozioni apretosa (sa primu firma est de Marco Espa) cun s'iscopu de tutelai s'assistu chi, cun sa lei 162, in custus annus esti stetia garantia a prus de 28milla personas diversamenti abilis. "Pedeus - at nau Espa - de disponiri is 28 millionis po podi donai milla eurus a dognia progetu chi esti stetiu giai aprobau e finanziau". De Radouan Ben Amara (Federazione de sa Sinistra - Pdci) est arribbau un'imbidu a sa mobilitazioni, unendi is assoziazionis e is personas diversamenti abilis in d'unu sit in a facc''e s'assembrea de via Roma. Po difendiri is pranus "ad personam" su Consillu provinziali de su Campidanu de Mesu at approvau un'odg contra a sa diminuzioni de su dinai destinau a is diversamenti abilis.