No a su dinai liau a is pianus de assistu de sa 162. Diversamenti abilis e associazionis portant su própiu arràbiu in Consillu regionali

(IlMinuto) – Casteddu, 19 de su mes''e gennargiu - Est arribbada a facc''e su Consillu regionali s'opposizioni a is "tagli indiscrimininati da mille euro" a is pianus de assistu po is personas cun handicap medas grais previdius de sa lei 162 de su 1998. Custu mangianu 250 personas- traballantis de su settori, rappresentantis de is associazionis, diversamenti abilis e familias - ant manifestau in via Roma po pediri un'aumentu de is finanziamentus. S'iniziativa, promòvia de s'onlus "Pensiero felice" de S'Alighera at coinvolgiu dexinas de associazionis de totu sa Sardigna, su gruppu Facebook "No ai tagli indiscriminati da 1000 euro ai piani legge 162" - chi at arregortu a oi casi 4milla iscrittus - e su "Comitato delle famiglie per la 162". Una delegazioni de 20 manifestantis at essi arricia de is cappogruppu de sa "Commissione Sanità" in d'unu momentu de pàusa de su Consillu. A su merì (14.00, Hotel Regina Margherita) est previdia un'assembrea oberta de su "Comitato per la 162". Atóbiu aundi s'isperat de aghilliri puru is autoridadis regionalis cumpetentis. Cida passada is rappresentantis de totu s'opposizioni iant presentau una mozioni urgenti, cun sa dimanda de convocazioni estraordinaria de su Consillu regionali chi serbit po otèniri su stanziamentu de su dinai nezzessariu - circa 28 millioni de eurus - a evitai de ndi liai totu su chi spetat a is pianus de assistu.