Festa de Sant'Antoni: su 16 in Mamujada s'alluimentu de su foghidoni. Su 17 sa primu bessida de is Mamuthones

(IlMinuto) – Casteddu, 8 de su mes''e gennargiu - S'annunziu de su pesperu e s'alluimentu de su foghidoni a facc''e sa crèsia parrochiali de sa bidda. In Mamujada cuminzat in custu modu - e aici at essi puru in su 2010 - sa Festa de Sant'Antoni de su o' u' - de su 16 e de su 17 de su mes''e gennargiu. A pustis de s'alluimentu de su foghidoni, comenti bollit sa tradizioni, is fidelis narant po tres bortas su Credu faendi tres arrollius a giru a giru de su fogu, chi benit a pustis benedigiu de su préidi impari cun sa statua de su Santu. Agoa, de su fogu prinzipali benint allutus in dognia bixinau aterus fogus. Po duas o puru tres diris is mamujadinus pichetant a ingiriu a is fogus cun su binu e is drucis sadrus. Su 17 est sa primu bessida de s'annu de is màscaras de sa tradizioni, is  Mamuthones e is Issohadores, chi in 30 o in 40 si movint a ingiriu a is fogus, bixinau a bixinau. "Funt medas - si podit liggiri in d'una nota de su Museu de is "Maschere mediterranee" de Mamujada - is interpretamentus chi si funt fattus po su Carnovali mamujadinu, segundu calincunu de custus is Mamuthones interpretant su disígiu de stresiai su mali e is arragus de s'annada".