Ex presoneri si ndi liat sa vida: Caligaris (Sdr), "Istituzionis débbilis ananti a s'apretu mannu e malu"

(IlMinuto) – Casteddu, 5 de su mes''e gennargiu - "Candu unu piciocu de 23 annus, a pustis de ai decidiu de si riscatai, sceberat de si negai sa vida po mori de su disisperu bollit nai ca is istituzionis funt tropu débbilis ananti a s'apretu mannu e malu". Ddu narat cun d'una nota Maria Grazia Caligaris, presidenti de s'associazione Socialismo Diritti Riforme commentendi sa morti de un'ex presoneri giòvanu - furiat bessiu de su presoni su 2 de su mes''e gennargiu - acadessia in sa noti tra domìnigu e lùnis in Cuartu Sant'Alèni. "Sa pérdida de una vida in su frori de is annus - narat sa Caligaris - a pustis de sa permanénzia in d'un'Istitutu de Pena fait pensai a s'òbera de is istituzionis in su territoriu". "Cantu est acadessiu - spiegat s'esponenti socialista - est unu signali claru de sa nezzessidadi de torrai a biri su sistema de is presonis criendi is cundizionis de recúperu a foras de su presoni, condizionis chi agiudint is cittadinus ex presoneris a (...) torrai a allui  s'isperànzia. Sa zertesa de unu traballu, mancai modestu, est su primu passu po torrai a tenni sa dignidadi e po si proiettai in sa vita chi benit. Po arribbai a custu obbiettivu (...) funt perou nezzessarius investimentus giustus. A ndi tenni profetu at essi totu sa soziedadi".