Caligaris (Sdr), "De tres mesis in Buoncammino unu presoneri chi no podit abarrai in presoni"

(IlMinuto) - Casteddu, 28 de su mes''e gennargiu - "Is perízias, puru cussas fattas de su Tribbunali, no lassant dúbbius. Roberto Vinci, 38 annus, no podit abarrai in presoni perou est in presoni giai de tres mesis". Ddu narat cun d'una nota sa presidenti de s'associazioni "Socialismo Diritti e Riforme" Maria Grazia Caligaris. "S'ómini- narat s'esponenti socialista - est malàdiu, tenit un'esaurimentu meda malu, accumpangiau de s'istintu de si bociri, e est presoneri in su "Centro diagnostico terapeutico" de Buoncammino aundi ddu castiant sempiri cun d'una "telecamera". Is condizionis de saludi de s' ómini s'aggravant de diri in diri e est sempiri prus difícili nd'afrontai is reazionis. Unu fattu chi depit essi risolviu de pressi". Su presoneri est imbàlidu a s'80 po centu e esti stetiu nau ca no podit abarrai in presoni puru a pustis de sa bisita in s'"Ospedale psichiatrico giudiziario".
"Est una cosa assurda ca una persona cun custu mali meda malu a conca - sighit - possat abbarai in istadu de isolamentu aintru de unu presoni aundi no est possibbili fai nemancu is curas nezzessarias. In is líteras mandadas a s'associazioni e in is atóbius in presoni s'ómini at ammostau una suferénzia manna e pediu de podi andai in d'una comunidadi".