Un'annu de s'operazioni "Piombo Fuso": 1300 mortus e 6milla ferius. Sit in po susteniri sa "Gaza Freedon March"

(IlMinuto) - Casteddu, 28 de su mes''e paschixèdda - Arregordai su primu anniversariu de s'operazioni "Piombo Fuso", cun cust'iscopu su "Cagliari social forum" e s'assoziazioni "Sardegna Palestina" ant manifestau ariseru a mangianu in Casteddu cun d'unu sit in a facc''e sa Cresia de Bonaria. De domìnigu a mercuris ant essi dexinas is manifestazionis aprontadas in totu s'Italia po arregordai su massacru e po susteniri su bloccu de s'economia de Israele e de sa "Gaza Freedom March", po segai s'arroccamentu de sa Striscia de Gaza chi centinàrias de personas ant a fai s'ùrtima diri de s'annu. "Su 27 de su mes''e paschixèdda de su 2009 - si podit liggiri in s'appellu de su Cagliari Social Forum - est su primu anniversariu de s'operazioni "Piombo Fuso", s'assaltu meda mannu chi su stadu de Israele at fattu po 23 diris contra a unu milioni e mesu de palastinesus in sa Striscia de Gaza, causendi prus de 1300 mortus, 6milla feridus e sciàscius e sufferenzias meda mannus. Is sciàscius medas mannus causaus de tres cidas de bombas si funt aciuntus a is sciàscius de s'imbargu, bófiu e fattu de Israele, Stati Uniti e Unioni Europea, chi de prus de duus annus imipidit a is mercis e a sa cos''e pappai de passai aintru de sa Striscia, blocchendi puru sa possibbilidadi de is aggiudus umanitarius".