"Su cantu e sa limba": s'Isola de ariseru e de oi s'ascultat a Radio Sardinia

(IlMinuto) – Casteddu, 28 de su mes''e paschixèdda - "S'atacamentu meda mannu a sa terra nostra, is próprias tradizionis e sa própriu música". Funt custas is arrexonis chi ant spintu sa giòvana giornalista Veronica Atzei, impari a Carla Piras e a Alberto Atzori, a fai "Su cantu e sa limba": programma ràdiufonicu sadru de Radio Sardinia, chi si podit ascurtai de su mes''e ledaminis finzas a su mes' paschixèdda dognia sabudu in sa ràdiu de Santu Bainju. "Radio Sardinia - spiegat Atzei - at sempiri dedicau meda atenzioni a sa limba e a sa música de sa Sardigna e traballat cun su sadru de circa 20 annus. Ocannu eus tentu puru is contributus de sa Regioni. Est po mori de custus chi eus fattu custu progettu". Unu programma de duas oras totu in sadru, chi ponit a cunfrontu sa Sardigna de ariseru e de oi: sa música, sa cultura, su teatru, sa limba e sa cuxina. "In sa trasmissioni - narat Atzei - eus circau de insertai materiali 'béciu e nou'. Eus propostu po fai un'esémpiu is cantadas de 25-30 annus fait e is cantadas de oi po ammostài comenti custas funt cambiadas cun su tempus e comenti siant stetias in gradu de custodiai intatta calincuna carettistica. Eus fattu ascurtai puru música contemporanea, ammostendi comenti s'Isola nostra siat stetia capazi de s'oberri a is influxus de sa música mondiali".

 

Po ndi sciri de prus: www.radiosardinia.it