Puru su "Comitato per la territorialità della pena" in Siano po su presidiu de Annunou po portai solidariedadi a Bruno Bellomonte

(IlMinuto) - Casteddu, 30 de su mes''e paschixèdda - Sa mancanzia de s'eserciziu de sa lei 354 de su 1975 e de su protocollu de intesa tra Stadu e Regioni po sa territorialidadi de sa presonia funt una pena in prus po is presoneris e po is famiglias insoru. Est cantu dinunziat cun d'unu comunicau su "Comitato per la territorialità della pena", chi adirit a su presidiu aprontau de A Manca pro s'Indipendentzia po sa noti de Annunou a facc''e su presoni de Siano, in Calabria, aundi de su mes''e argiolas est presoneri Bruno Bellomonte, dirigenti de su movimentu indipendentista e comunista. Su Comitau - si podit liggiri in su documentu - cundividit "sa dinùnzia fatta de aMpI contra a s'inosservanzia de sa lei 354/75 e de su protocollu de intesa tra su Stadu e sa Regioni chi istabbilit ca sa pena de presonia possat essi iscontada in is presonis acanta de is logus aundi bivint is familias". Po aggiudai sa dimanda de eserciziu de sa lei portada innantis de su Comitau "puru diversas amministrazionis comunalis e provìnzialis de sa Sardigna - si podit liggiri in sa nota - funt donendi su sustegnu insoru". Finzas a oi cantu propostu de su Comitau esti stetiu approvau de su comunu de Sènnaru e de sa provìnzia de Nùgoro. In is diris passadas s'"odg" esti stetiu esaminau de su Consillu provinziali de su Campidanu de Mesu, aundi su tema at essi esaminau candu s'at a torrai a traballai.