Prato: "Unu préziu mínguu po su lati de brebei". Atóbiu oi in Casteddu

(IlMinuto) – Casteddu, 22 de su mes''e paschixèdda - Torrat a partiri su cunfrontu po su cumpartu de is brebeis in Sardigna. S'assessori regionali de s'"Agricoltura", Andrea Prato, at mandau s'avisu po oi a totus is sogetus interessaus, po s'atobiai in Casteddu in sa Fiera Intenazionali de sa Sardigna, "po discùtiri - si podit liggiri in d'una nota - de is chistionis de su cumpartu, unu cumpartu meda importanti po s'economia de sa Sardigna". Est previdia sa partecipazioni de is cummosàrius de is Agenzias "Agris", "Laore" e "Argea", de is associazionis de categoria, de is centralis coperativas, de "Assolate", de is rappresentantis de su "Consorzio Latte" e de is "Consorzi di tutela di Pecorino romano, Fiore sardo e Pecorino sardo", de sa Sfirs e de is istitutus bancarius. "Sa Regioni - at nau Prato - at a sighiri in su ruolu de mediazioni tra is partis e at a torrai a fai una proposta operativa: garantiri unu préziu mínguu po su lati de brebei".