Nascit in S'Alighera su Comitato per la difesa della pianicazione paesaggistica". Soru tra is promotoris

(IlMinuto) - Casteddu, 15 de su mes''e paschixèdda - Sindigus, consilleris regionalis, sindacalistas, parlamentaris, associazionis e cittadinus: funt giai 100 is personas chi sustenint su "Comitato per la Difesa della Pianificazione paesaggistica" nàsciu su 5 de su mes''e paschixèdda in S'Alighera in su cursu de un'assembrea promòvia de "Sinistra Ecologia e Libertà". Su primu iscopu de su Comitau est costruiri s'oposizioni a su "Piano casa" aprovau de su Consillu regionali cun cussa chi s'esponenti de su movimentu de Nichi Vendola, Carlo Sechi, at definiu "una lei imbruttada de ludu de poniri foras 'e lei". Unu provvedimentu - at nau Stefano Deliperi de su "Gruppo di Intervento Giuridico" - chi arrespundit a interessus economicus prezisus. "Cun s'istrinta de su creditu de parti de is bancas, una cosa normali in tempus de crisi economica - at nau Deliperi - no ant essi is imprendidoris piticus a otèniri benefízius de sa norma chi at a bolli torrai a fai bivi beni s'economia: ant essi is solitus nòminis de imprendidoris sadrus mannus a ndi otèniri intróitu". Tra is promotoris de su Comitau ddoi est puru s'ex presidenti de sa Regioni, Renato Soru. "Is mellus lotas - at precisau Soru - funt cussas chi eus arrennesci a fai totus impari, dogniunu cun sa própriu bandèra, perou cun d'un'iscopu comuni. Custu comitau est importanti poita is cosas importantis depint essi concuistadas e difèndias dognia diri".