Fortuna po su No Nuke Day: musica e fueddus contra a su nucleari in Sardigna

(IlMinuto) - Casteddu, 9 de su mes''e paschixèdda - Crescit de diri in diri su movimentu contra a su nucleari in Sardigna. Ariseru a merì in praza Carmine in Casteddu casi 500 personas ant nau no a sa costruzioni de centralis nuclearis e a is depositus de ferrinas in s'Isola. Una lota prus forti puru grazias a s'iniziativa de su referendum de is indipendentistas. S'organizzazioni indipendentista at arregortu finzas a custu momentu 6500 firmas po susteniri su referendum chi narat: "Ses contra a sa costruzioni de centralis nuclearis e a is depositus de ferrinas radioattivas in Sardigna (...)?". Su movimentu de Bustianu Cumpostu - presenti ariseru cun is banchittus po arregolliri is firmas - at donau unu agiudu mannu a sa preparazioni de su No Nuke Day. "Eus dezidiu - at nau su leader indipendentista a IlMinuto - de fai sa proposta nostra a sa genti, senz''e passai atressu de is filtrus de sa politica". A s'iniziativa ant partizipau su "Cagliari Social Forum", "Emergency" e is "Verdi". Sa serada esti stetia oberta candu funti intervennias personas spertas e chi militant. Funt arziaus in su palcu puru Giacomo Meloni (Css), Mariella Cao (Gettiamo le basi) e Andrea Olla (Cagliari Social forum). Sa diri de protesta s'est serrada cun sa musica de Rossella Faa, Mario Mossa Quintet, Erotik Monkey e ateras band.