Ex Scaini Biddexidru: s'assessori Ortu, "Cappellacci no rispondit a sa dimanda de atóbiu, a fin''e annu centu familias a manus sbuidas"

(IlMinuto) – Casteddu, 2 de su mes''e paschixèdda - "su Presidenti de sa Giunta regionali no rispondit a sa dimanda de atóbiu po s'esàminu de is chistionis de is traballantis ex Scaini de Biddexidru". Est cantu dinunziat cun d'una nota stampa s'assessori provinziali de su "Lavoro" de su Campidanu de Mesu, Velio Ortu. Bia s'ausenzia de arrespustas de parti de su presidenti de sa Regioni, Ortu at convocau po custumerì a is 17.30, in s'àula consiliari de su comunu de Guspini un'assembrea cun sa participazioni de is sindigus de su territoriu, de is organizzazionis sindacalis e de is traballantis de s'azienda. "S'assembrea - serrat s'assessori - pigau atu de s'ausenzia de arrespustas de parti de sa Regioni Sardigna, at a pigai iniziativas de protesta giustas po fai acabbai custa situazioni ruinosa de is traballantis de s'ex Scaini de Biddexidru: po custus traballantis su 31.12.09 finit sa pròroga de sa mobilidadi in dèroga, cun sa conseguènzia ca una centinaia de familias s'ant a agatai senz''e nesciuna crobetànzia soziali e senz''e nesciuna ipótesi de podi torrai a su própriu traballu".